မြန်မာနိုင်ငံရှိ အမျိုးသမီးများသည် ဆယ်စုနှစ်များစွာကြာ ပဋိပက္ခ၊ အကြမ်းဖက်မှုများနှင့် ဖိနှိပ်မှုများကို ရင်ဆိုင်ရချိန်တွင် စိတ်ခွန်အားနှင့် ခံနိုင်ရည်ရှိမှုများအား ပြသခဲ့ကြသည်။ ဤပြပွဲသည် ရှင်သန်လွတ်မြောက်သူ အမျိုးသမီးများ၏ ဇာတ်လမ်းများနှင့် ဖျောက်ဖျက်မရနိုင်သော စိတ်ခွန်အားတို့ကို ၎င်းတို့၏ ခန္ဓာကိုယ်အရွယ်အစားနှင့်အညီ ကိုယ်တိုင်ဖန်တီးရေးဆွဲထားသော body maps များမှတစ်ဆင့် သက်သေပြရန် ရည်ရွယ်သည်။

၂၀၂၀ ခုနှစ် မတ်လ၊ ကိုဗစ်-၁၉ ကပ်ရောဂါ အရှိန်အဟုန်ဖြင့် စတင်ပြန့်ပွားလာနေချိန်တွင် အာရှတရားမျှတမှုနှင့် လူ့အခွင့်အရေးအဖွဲ့ (AJAR)၊ ကရင်အမျိုးသမီးအစည်းအရုံး (KWO)၊ ကချင်အမျိုးသမီးအစည်းအရုံး ထိုင်းနိုင်ငံ (KWAT)၊ တအာင်းအမျိုးသမီးအဖွဲ့အစည်း (TWO)နှင့် ဝိမုတ္တိအမျိုးသမီးများအဖွဲ့ (VWO) တို့သည် မြန်မာနိုင်ငံမြောက်ပိုင်း တောင်ကုန်းမြင့်များပေါ်တွင် နေထိုင်ရပ်တည်လျက်ရှိသော လူ့အခွင့်အရေးချိုးဖောက်မှုများမှ ရှင်သန်လွတ်မြောက်သူ အမျိုးသမီး ၁၂ ဦးကို ၎င်းတို့၏ ဇာတ်လမ်းများအား ဝေမျှရန် စုစည်းခေါ်ဆောင်ခဲ့ပါသည်။ အသက် ၂၀ မှ ၇၀ အရွယ်ကြားရှိ အမျိုးသမီးများသည် အမှန်တရားထုတ်ဖော်ပြောပြခြင်း၊ စည်းလုံးညီညွတ်မှုအားပြသခြင်းနှင့် ဆန်းသစ်သော ထုတ်ဖော်ပြောဆိုမှုဆိုင်ရာ အတွေ့အကြုံတစ်ခုတွင် ပါဝင်ရန်အတွက် ခရီးဝေးမှ လာခဲ့ကြရသည်။

တောင်အာဖရိက အနုပညာရှင်၊ နိုင်ငံရေးအကျဉ်းသားဟောင်းနှင့် မြေအောက်တက်ကြွလှုပ်ရှားသူ Shirley Gunn သည် အမျိုးသမီးများအား ၎င်းတို့၏ ဘဝဖြတ်သန်းမှုအဆင့်ဆင့်ကို ပြန်လည်အမှတ်ရ ထင်ဟပ်စေသည့် အကြောင်းအရာများကို ၎င်းတို့၏ ခန္ဓာကိုယ်အရွယ်အစားရှိ ပိုစတာများပေါ်တွင် ရေးဆွဲစေသည့် လုပ်ငန်းစဉ်ကို ငါးရက်ကြာ လမ်းညွှန်ပေးခဲ့သည်။ တစ်ပတ်အတွင်း အမျိုးသမီးများသည် ၎င်းတို့၏ ဝမ်းနည်းပူဆွေးခြင်း၊ ဆုံးရှုံးခြင်း၊ ပျော်ရွှင်ခြင်း၊ စိတ်သက်သာရာရခြင်း၊ ဒေါသ နှင့် စိတ်ဓာတ်ခိုင်မာပြတ်သားခြင်း အစရှိသည့် စိတ်ခံစားချက်များစွာပါဝင်နေသည့် ဇာတ်လမ်းများကို မျှဝေခဲ့ကြသည်။ အမျိုးသမီးများသည် အတိတ်မှအဖြစ်အပျက်များ၊ အမှတ်တရများအပြင် အနာဂတ်နှင့်ပတ်သက်သည့် မျှော်လင့်ချက်နှင့် စိုးထိတ်မှုများကိုလည်း မျှဝေခဲ့ကြသည်။ အမျိုးသမီးအနည်းစုမှာ ပန်းချီရေးဆွဲသည့် အတွေ့အကြုံရှိသော်လည်း အချို့ကတော့ ရောင်စုံခဲတံ သို့မဟုတ် စုတ်တံတို့ကိုပင် ထိတွေ့ကိုင်တွယ်ဖူးခြင်းမရှိသည်ကို တွေ့ရသည်။ သို့သော်လည်း ရက်သတ္တပတ်အပြီးတွင် အမျိုးသမီးများသည် အရောင်အသွေးစုံလင်သော body maps များကို ဖန်တီး၍ သူမတို့၏ ဘဝအဖြစ်အပျက်၊ အကြောင်းအရာများကို ပြီးပြည့်စုံစွာ ဖော်ပြနိုင်ခဲ့သည်။

၎င်း body map များသည် မြေမြှုပ်မိုင်းများနှင့် သေနတ်ပစ်ခတ်ခံခဲ့ရခြင်းမှ ရရှိခဲ့သော အမာရွတ်များနှင့် ဒဏ်ရာများ၊ နှစ်ပေါင်းများစွာ ထိန်းသိမ်းခံထားရခြင်းကြောင့် ကာလကြာရှည်စွာ ထိခိုက်ခံစားရမှုများ၊ ပဋိပက္ခအတွင်း မြန်မာစစ်တပ်၏ ရက်စက်ကြမ်းကြုတ်စွာ တိုက်ခိုက်မှုများကြောင့် သေဆုံးခဲ့ရသည့် သူငယ်ချင်းများနှင့် မိသားစုဝင်များအတွက် ဝမ်းနည်းပူဆွေးနေရဆဲဖြစ်သည့် ခံစားချက်များ အစရှိသည့် မြန်မာနိုင်ငံရှိ အမျိုးသမီးများ တွေ့ကြုံခံစားခဲ့ရသည့် ချိုးဖောက်မှုများစွာကို ဖော်ပြနေပါသည်။

ဤ body map များသည် ၂၀၂၁ ခုနှစ် ဖေဖော်ဝါရီလ ၁ ရက်နေ့ စစ်တပ်မှ အာဏာသိမ်းမှုမတိုင်မီ ဆယ်စုနှစ်များစွာကြာ မတရားဖိနှိပ်မှုနှင့် ချိုးဖောက်မှုများကို ခံစားခဲ့ရသော အမျိုးသမီးများ၏ ဘဝများကို ပုံဖော်ပြသနေသည်။ ၎င်း body map များသည် အမျိုးသမီးများ၏ ဇာတ်လမ်းများကို သက်ဆိုင်ရာ အကြောင်းအရာများနှင့် ဆက်စပ်ချိတ်ဆက်ရန်အတွက် အထောက်ကူပြုနိုင်ပါသည်။ ၂၀၂၁ ခုနှစ် စစ်တပ်အာဏာသိမ်းမှုသည် အမျိုးသမီးအများစုအတွက်တော့ နှိပ်စက်ညှင်းပန်းမှုများ၏ အစမဟုတ်ပေ။ ၎င်းတို့အတွက် ထိုအရာသည် နှစ်လကြာရှည်စွာခံစားခဲ့ရသည့် ဒုက္ခများ၊ ရုန်းကန်မှုများ၊ စိတ်ဓာတ်ခိုင်မာပြတ်သားမှုများဖြင့် ဖြတ်သန်းလာရသည့် သမိုင်းတစ်လျှောက်တွင် ပါရှိသော အခန်းကဏ္ဍတစ်ခုသာဖြစ်သည်။

၂၀၂၀ ခုနှစ် မတ်လ ၂၄ ရက်နေ့တွင် ရန်ကုန်၌ အများပြည်သူအား ပြသရန် ပြပွဲစီစဥ်ထားခဲ့သော်လည်း ကိုဗစ်-၁၉ ကပ်ရောဂါကြောင့် စိတ်မကောင်းစွာ ရွှေ့ဆိုင်းခဲ့ရပြီး ခရီးသွားလာမှုနှင့် အများပြည်သူ စုဝေးမှုကန့်သတ်ချက်များ ဖြေလျော့လာသည့်အချိန်တွင် ပြပွဲပြန်လည်ပြုလုပ်မည်ဆိုသည့် မျှော်လင့်ချက်များဖြင့် body map များအား သိမ်းဆည်းထားခဲ့သည်။

၎င်းကန့်သတ်ချက်များ မဖြေလျော့ခင်မှာပင် မြန်မာစစ်တပ်မှ အာဏာသိမ်းခဲ့၍ body map များအား ဖုံးကွယ်ဝှက်ထားခဲ့ရပြန်သည်။ Body map များအား ရေးဆွဲခဲ့သော အမျိုးသမီးများ၏ ဘေးကင်းလုံခြုံရေးနှင့်ပတ်သက်၍ ပြင်းထန်သည့် ခြိမ်းခြောက်မှုများ ဖြစ်ပေါ်လာနိုင်သည့်အတွက် AJAR အနေဖြင့် ၎င်း body map များအား ဖျက်ဆီးရန် အင်မတန်ခက်ခဲစွာ ဆုံးဖြတ်ချက်ချခဲ့ရသည်။ ထိုရှင်သန်လွတ်မြောက်သူအမျိုးသမီးများ လူကိုယ်တိုင်ပြန်လည်တွေ့ဆုံ၍ သူမတို့၏ ဇာတ်လမ်းများကို အများပြည်သူထံ တိုက်ရိုက်မျှဝေနိုင်မည့်နေ့ မကြာမီရောက်လာမည်ဟု မိမိတို့အနေဖြင့် မျှော်လင့်ပါသည်။ ၎င်း အဖြစ်အပျက်များကြောင့် ယခုကာလအတောအတွင်းတွင် ကျွန်ုပ်တို့သည် ဒစ်ဂျစ်တယ်ပြပွဲအား စီစဥ်ဆောင်ရွက်ခဲ့ပါသည်။ ရှင်သန်လွတ်မြောက်သူအမျိုးသမီးများ၏ ကိုယ်ပိုင်အထောက်အထား၊ အချက်အလက်များကို ထိန်းသိမ်းကာကွယ်ရန်အလို့ငှာ အမည်၊ မျက်နှာ နှင့် body map တွင် ပါဝင်သော အသေးစိတ်အချက်အလက်အချို့အား မှုန်ဝါးထားပါသည်။ အချက်အလက်များကို မှုန်ဝါးထားသော်လည်း ရှင်သန်လွတ်မြောက်သူ အမျိုးသမီးများ၏ ကြုံတွေ့ခဲ့ရသည့် အဖြစ်အပျက်၊ အတွေ့အကြုံများသည် အမှန်တရားအတိုင်း တည်ရှိနေဦးမည်မှာ မလွဲဧကန်ပင်ဖြစ်သည်။