အားလွမ်

ကလေးဘဝ

အားလွမ်ကို ကချင်ပြည်နယ်တောင်တန်းဒေသရှိ ဝေးလံခေါင်ဖျားသော ကျေးရွာတစ်ရွာတွင် မွေးဖွားခဲ့ပါသည်။ သူမ၏ ဖခင်မှာ ကျောင်းဆရာတစ်ဦးဖြစ်ပြီး လယ်သမားတစ်ဦးလည်း ဖြစ်ပါသည်။ သူမငယ်ရွယ်စဉ်ကမိသားစု ကျွဲ မွေးမြူရေးတွင် ကူညီခဲ့သည်။ သူမနေထိုင်ရာဒေသအတွင်း တိုက်ပွဲများ အစဉ်မပြတ်ဖြစ်ပွားခဲ့ပြီး မိသားစုမှာလည်း ကြိမ်ဖန်များစွာ ထွက်ပြေးခဲ့ရသည်။ တစ်ကြိမ်တွင် ရွာသားများသည် တောထဲတောင်ထဲတွင် ရွာသစ်ပြန်တည်ခဲ့ကြရသည်။

လူကြီးဘဝ

သူမသည် နှစ်အတန်ငယ်ကျောင်းနေဖူးသော်လည်း စာသင်ကျောင်းသည် အလွန်ဝေးကွာသောကြောင့် ကျောင်းကိုပြီးစီးအောင်တက်ရောက်နိုင်ခဲ့ခြင်းမရှိပါ။ ပညာရေးသည် အလွန်အရေး ကြီးကြောင်း သူမကို မည်သူကမှ မပြောပြခဲ့ပါ။ သူမအလယ်တန်း တက်ရောက်စဉ် စတင်တွေ့ဆုံချစ်ကြွမ်းဝင်ခဲ့သူ အမျိုးသားနှင့် လက်ထပ် ထိမ်းမြားခဲ့ပြီး ကလေးနှစ်ဦး မွေးဖွားခဲ့သည်။ ထို့အပြင် ခဲအိုဖြစ်သူ၏ သားကိုလည်း မွေးစားခဲ့ကြသည်။ သူမသည် တနင်္ဂနွေဘုရားကျောင်းတွင် ကျောင်းဆရာမနှင့် မူကြိုကျောင်း၏ လက်ထောက်လည်း ဖြစ်လာသည်။

လူကြီးဘဝ

၂၀၁၃ တွင် သူမ၏ ခင်ပွန်းဖြစ်သူသည် မြန်မာစစ်တပ်၏ ဖမ်းဆီးသတ်ဖြတ်ခြင်းကိုခံခဲ့ရသည်။ ၂၀၁၆ တွင် သူမ၏ မိသားစုသည် တိုက်ပွဲများကြောင့် ထပ်မံထွက်ပြေးခဲ့ရပြီး သူမ၏ အိမ်နှင့် ပိုင်ဆိုင်သည့် ပစ္စည်းများ ဖျက်ဆီးခံခဲ့ရသည်။ ထွက်ပြေးကြစဥ်အတွင်း သူမ၏ ယောက္ခမဖြစ်သူမှာလည်း ကွယ်လွန်သွားခဲ့သည်။ အားလွမ်သည် သူမ၏ကျေးရွာအနားရှိ စစ်ရှောင်စခန်း (IDP camp) တွင် နေထိုင်နေပါသည်။ အသက်ရှင်ရပ်တည်နိုင်ရေးအပြင် အိမ်နှင့်ကျေးရွာပြန်လည် တည်ဆောက် နိုင်ရေးအတွက်ပါ သူမရုန်းကန်နေရသည်။ လူ့အခွင့်အရေးချိုးဖောက်မှုမှ ရှင်သန်လွတ်မြောက် လာသူများနှင့် ချိတ်ဆက်ပေးသော ဒေသအစုအဖွဲ့တစ်ခုတွင် ပါဝင်ဆောင်ရွက်ခဲ့ပြီး သူမ၏ အဖြစ်အပျက်ကို မျှဝေပြောကြားရင်း ဘဝတူ အမျိုးသမီးများထံမှလည်း ခွန်အားများကိုလည်း ရရှိခဲ့ပါသည်။

ခန္ဓာကိုယ်

သူမ၏ မျက်နှာပေါ်မှ မွေးရာပါအမှတ်အပြင် ကိုယ်ဝန်ဆောင်ရခြင်းကြောင့် ဗိုက်ကြောပြတ်ရာများနှင့် မွေးမြူရေးတိရစ္ဆာန်များကြောင့်ရရှိသောအမာရွတ်များ သူမကိုယ်မှာရှိနေသည်။ ကလေးဘဝက သူမ၏ကျေးရွာကို စွန့်ခွာထွက်ပြေးရချိန်တွင် ရရှိခဲ့သော ခွေးကိုက်ဒဏ်ရာအမာရွတ်မှာလည်း သူမ၏ ဒူးခေါင်းတွင်ခုထိရှိနေသေးသည်။

“ကျွန်မရဲ့ ကိုကိုယ်စားပြုတာတဲ့သင်္ကေတကတော့ မြင်းတစ်ကောင်ပါ။ ဘာကြောင့်လဲဆိုတော့ ကျွန်မက အလုပ်ကြိုးစားသူ တစ်ဦးဖြစ်လို့ပါ။ မြင်းက ထင်းတွေနဲ့ လူတွေကို ထမ်းပိုးသယ်ဆောင်ပေးပါတယ်။ ကျွန်မကျတော့ ကျမကလေးတွေအတွက် ကိုယ့်ခြေထောက်ပေါ်ကိုယ်ရပ်ပြီး ရှာဖွေကျွေးမွေး ရတယ်လေ။”

မျှော်လင့်ချက်များနှင့် အိပ်မက်များ

အားလွမ်သည် တစ်နေ့တွင် သူမ၏ ကျေးရွာတွင် စျေးဆိုင်တစ်ခု ဖွင့်လှစ်နိုင်ရန် မျှော်လင့်လျှက်ရှိသည်။ ပဋိပက္ခကြောင့် ပျက်စီးဆုံးရှုံးမှုများစွာဖြစ်ခဲ့သည့်အတွက် သူမ၏ အသိုင်းအဝိုင်းကို ပိုမိုဘေးကင်းလုံခြုံစေချင်နေသည်။ အခြားရှင်သန်လွတ်မြောက်သူများနှင့် ဆက်သွယ်ချိတ်ဆက်ခြင်းဖြင့် အကယ်၍အမျိုးသမီးအားလုံး အတူတကွလက်တွဲပူးပေါင်း လုပ်ဆောင်ကြပါက သူတို့၏ လူ့အသိုင်းအဝိုင်းတွင် တရားမျှတမှုနှင့် ငြိမ်းချမ်းရေးကို ဖန်တီးနိုင်မည်ဖြစ်ကြောင်း သူမယုံကြည်လျှက်ရှိသည်။